Mamlakatimizda GM uchun dunyo bo‘yicha butlovchi qismlarni yetkazib beruvchilarga «GM Supplier Quality Excellence 2015» mukofotini topshirish marosimi bo‘lib o‘tdi.
«GM Operations Uzbekistan» ning Prezidenti va boshqaruvchi direktori Xektor Villarreal, yetkazib berilayotgan mahsulotlarning sifatini oshirish va nazorat qilish bo‘yicha GM International ning mintaqadagi direktori Djeuel Shi hamda rahbariyat vakillari 10 dan ortiq mukofotlarni topshirish uchun «GM Uzbekistan» AJ ga butlovchi qismlarni yetkazib beruvchi korxonalar rahbarlari bilan uchrashishdi. «Uz-TongXong Co.», «Uz-Hanwoo», «Uz-DongJuPaint Co.», «Uz-Chasis», «Uz-Sungwoo», «Uz-SaeMyung Co.», «Uz-EraeCable», «Uz-Dong Won Co.», «Uz-Erae Climate Control», «Kwangjin Autosistems» qo‘shma korxonalari va Jizzax akkumulyator zavodi jamoasiga mazkur mukofotlar topshirildi.
Taqdirlash marosimida so‘zga chiqqan Xektor Villarreal o‘zlarining sidqidildan qilgan mehnati tufayli «GM Uzbekistan» AJ ning muvaffaqiyatiga munosib hissa qo‘shganligi uchun korxonalar rahbarlariga o‘z minnatdorchiligini bildirdi. Shuningdek kompaniyalar vakillari va Djeuel Shi xonim ish jarayoni bilan tanishishi maqsadida qator korxonalarga tashrif buyurdi.